Rutsiro: Imyiteguro ya “Kivu Beach Expo and Festival” irakomeje

Yirunga Ltd ku bufatanye n’Akarere ka Rutsiro bakomeje imyiteguro y’imurikagurisha n’iserukiramuco (Kivu Beach Expo and Festival) mu rwego rwo guteza imbere ubukerarugendo bushingiye ku muco muri aka Karere.

Iri murikagurisha n’iserukiramuco ririmo gutegurwa mu Murenge wa Boneza ho mu Karere ka Rutsiro, aho igikorwa nyirizina kizaba mu kwezi k’Ukuboza 2025.

Umuyobozi wa Yirunga Ltd; IYAREMYE Yves yemeza ko ibikorwa nk’ibi bigira uruhare mu gukurura ba mukerarugendo harimo n’ababa baje kumurika ibikorwa byabo ndetse n’abaza bakurikiye imikino yo ku mazi n’ibindi.  Agaruka ku mwihariko w’iyi “Kivu beach expo” avuga ko irimo udushya twinshi.

Ati: “Harimo Umukino wo gukataza (Hiking) aho abasiganwa bagenda 20km. Ni umukino uzatangiza Expo usorezwa kuri Palega Beach Inn, Umukino umeze nka Tenis Badmethon uzakinirwa kuri KaySun Hotel ibarizwa ku gice cy’amahoteli cya Kariba, amarushanwa yo gutwara amato.”

Arakomeza ati: “Uyu uzaba ari umwanya mwiza wo kurushanwa ku batuye Boneza.  Amarushanwa yo koga na Volley Beach izakinirwa kuri Rushel Kivu Beach Resort kuwa 13 Ukuboza 2025, aho hazakorwa ubukerarugendo bwo kureba Inyambo zoga mu kiyaga cya Kivu, gusura ikirwa cya Napoleon. Hazakorwa n’ubukerarugendo bushingiye kuri Kawa muri Boneza Coffee.”

Muri “Kivu Beach Expo and festival” i Rutsiro bwa mbere mu mateka hazabera ibirori by’ubwato (Boat Party) kuwa 13-14/12/2025 aho abazabyitabira bazasusurutswa n’abahanzi batandukanye n’abadije bagezweho bazaba bavanga umuziki ari nako abitabiriye barya banywa mu kiyaga rwagati.

MUNYAMAHORO MUHIZI Patrick; Umuyobozi w’umurenge wa Boneza aganira n’itangazamakuru yavuze ko iki gikorwa giteganyijwe mu mpera z’uyu mwaka kizatuma Akarere ka Rutsiro by’umwihariko Umurenge wa Boneza uza ku rundi rwego mu rwego rw’ubukerarugendo bushingiye ku muco.

Umuyobozi w’Akarere ka Rutsiro; KAYITESI Dative avuga ko iri murikagurisha n’iserukiramuco ryitezweho byinshi.

Ati: “Iriya “Festival” ni ukugira ngo igaragaze Akarere kacu ka Rutsiro, ibimaze kugerwaho cyanecyane mu bukerarugendo kuko ni Akarere gafite ibyiza nyaburanga nka parike ya Gishwati, ikiyaga cya Kivu ndetse n’amahoteri ari ku Kiyaga cya Kivu, harimo n’ibirwa byashitura abantu ndetse akaba ari n’uburyo bwiza bwo kwigisha abantu koga. Ibyo ni ibintu byafasha abashoramari kumva ko imari yose bashora mu Karere ka Rutsiro nta gihombo bashobora kugira kubera ko ni akarere gafite ibintu nyaburanga.”

Ibirori bya “Kivu Beach Expo and Festival” biteganyijjwe kuzaba mu ntangiriro z’ukwezi k’Ukuboza kuva kuwa 09-15/12/2025 bikazabera mu busitani bugari bwa Palega Beach Inn ahitegeye neza ikirwa cya Bugarura gituwe n’abaturage basaga 2,000.

MUKAMUSONI Fulgencie